എമർജൻസി ആക്ട് ഉപയോഗിച്ചത് തെറ്റ്: കാനഡ ഫെഡറൽ അപ്പീൽ കോടതി

2022-ലെ കോൺവോയ് പ്രതിഷേധങ്ങൾക്കിടെ 'എമർജൻസി ആക്ട്'പ്രയോഗിച്ചതിനെതിരായ കോടതി വിധി ചോദ്യം ചെയ്തുകൊണ്ടുള്ള കനേഡിയൻ സർക്കാരിൻ്റെ അപ്പീൽ ഫെഡറൽ അപ്പീൽ കോടതി തള്ളി.പ്രതിഷേധ സമയത്ത് ഈ നിയമം ഉപയോഗിച്ചത് യുക്തിരഹിതമാണെന്ന് ജഡ്ജിമാർ നിരീക്ഷിച്ചു. ആഴ്ചകളോളം ഓട്ടവ നഗരവും ചില അതിർത്തികളും പ്രതിഷേധക്കാർ തടസ്സപ്പെടുത്തിയിരുന്നു.

2022 ഫെബ്രുവരി 14-നാണ് മുൻ പ്രധാനമന്ത്രി ജസ്റ്റിൻ ട്രൂഡോ എമർജൻസി ആക്ട് പ്രഖ്യാപിച്ചത്. പ്രതിഷേധക്കാരെ അറസ്റ്റ് ചെയ്യാനും വാഹനങ്ങൾ നീക്കം ചെയ്യാനും പോലീസിന് ഈ നിയമം പ്രത്യേക അധികാരം നൽകി. പ്രതിഷേധവുമായി ബന്ധമുള്ള വ്യക്തികളുടെ ബാങ്ക് അക്കൗണ്ടുകൾ മരവിപ്പിക്കാനും ഈ നിയമത്തിലൂടെ സർക്കാരിന് സാധിച്ചു. എന്നാൽ ഈ നടപടികൾ പൗരാവകാശങ്ങളുടെ ലംഘനമാണെന്നും ഇത് ന്യായീകരിക്കാനാവില്ലെന്നും കോടതി വിധിച്ചു. പ്രതിഷേധങ്ങൾ തടസ്സങ്ങൾ സൃഷ്ടിച്ചെങ്കിലും അവ രാജ്യസുരക്ഷയ്ക്ക് ഭീഷണിയാകുന്ന തരത്തിലുള്ളതായിരുന്നില്ല എന്ന് ജഡ്ജിമാർ പറഞ്ഞു. ഓട്ടവയിലെ ജനങ്ങളുടെ ജീവനോ സുരക്ഷയ്ക്കോ ഭീഷണിയുണ്ടായതിന് തെളിവുകളില്ലെന്നും കോടതി ചൂണ്ടിക്കാട്ടി.

സർക്കാർ തീരുമാനത്തിന് തൊട്ടുപിന്നാലെ പൗരാവകാശ സംഘടനകൾ ഇതിനെ കോടതിയിൽ ചോദ്യം ചെയ്തിരുന്നു. 2022-ൽ നടന്ന ഒരു പൊതു അന്വേഷണത്തിൽ സർക്കാർ നടപടി ശരിയാണെന്ന് കണ്ടെത്തിയിരുന്നെങ്കിലും കോടതികൾ അത് അംഗീകരിച്ചില്ല.     കാനഡയുടെ ചരിത്രത്തിൽ ആദ്യമായി ഉപയോഗിക്കപ്പെട്ട ഈ നിയമം ദുരുപയോഗം ചെയ്യപ്പെട്ടുവെന്നാണ് ഈ വിധി സ്ഥിരീകരിക്കുന്നത്.